ਅਮਰੀਕਾ ਵਿਚ ਹਿੰਦੂ ਪੁਜਾਰੀ ਦੀ ਕੁੱਟਮਾਰ

ਨਿਊਯਾਰਕ ਦੇ ਫਲੋਰਲ ਪਾਰਕ ਵਿਚ ਇਕ ਮੰਦਰ ਕੋਲ ਹਿੰਦੂ ਪੁਜਾਰੀ ’ਤੇ 52 ਸਾਲਾ ਵਿਅਕਤੀ ਨੇ ਹਮਲਾ ਕਰ ਦਿੱਤਾ। ਉਸ ਨੇ ਆਪਣੀ ਧਾਰਮਿਕ ਪੁਸ਼ਾਕ ਪਹਿਨੀ ਹੋਈ ਸੀ। ਅਮਰੀਕੀ ਮੀਡੀਆ ਮੁਤਾਬਕ ਸਵਾਮੀ ਹਰੀਸ਼ ਚੰਦਰ ਪੁਰੀ ਨੇ ਕਿਹਾ ਕਿ ਉਹ ਵੀਰਵਾਰ ਨੂੰ ਸਥਾਨਕ ਸਮੇਂ ਮੁਤਾਬਕ ਸਵੇਰੇ ਕਰੀਬ 11 ਵਜੇ ਸ਼ਿਵ ਸ਼ਕਤੀ ਪੀਠ ਕੋਲੋਂ ਗੁਜ਼ਰ ਰਿਹਾ ਸੀ ਤਾਂ ਪਿੱਛਿਉਂ ਇਕ ਵਿਅਕਤੀ ਨੇ ਹਮਲਾ ਕਰ ਦਿੱਤਾ। ਪੁਰੀ ਨੇ ਕਿਹਾ ਕਿ ਉਨ੍ਹਾਂ ਨੂੰ ਐਨੀ ਬੁਰੀ ਤਰ੍ਹਾਂ ਕੁੱਟਿਆ ਗਿਆ ਕਿ ਹਸਪਤਾਲ ਲਿਜਾਣਾ ਪਿਆ। ਖ਼ਬਰ ਚੈਨਲ ਮੁਤਾਬਕ ਪੁਜਾਰੀ ਦੇ ਪੂਰੇ ਸਰੀਰ ’ਤੇ ਰਗੜਾਂ ਦੇ ਨਿਸ਼ਾਨ ਸਨ। ਪੁਲੀਸ ਨੇ ਹਮਲੇ ਸਬੰਧੀ 52 ਸਾਲਾ ਸਰਗੀਓ ਗੁਏਵਿਯਾ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਉਸ ਉੱਤੇ ਹਮਲੇ, ਸ਼ੋਸ਼ਣ ਤੇ ਗ਼ੈਰਕਾਨੂੰਨੀ ਤਰੀਕੇ ਨਾਲ ਹਥਿਆਰ ਰੱਖਣ ਦਾ ਦੋਸ਼ ਲਾਇਆ ਗਿਆ ਹੈ। ਪੁਜਾਰੀ ਦੇ ਮੂੰਹ ਉੱਤੇ ਵੀ ਸੱਟਾਂ ਦੇ ਨਿਸ਼ਾਨ ਹਨ। ਪੁਲੀਸ ਇਸ ਹਮਲੇ ਦੀ ਕਈ ਪੱਖਾਂ ਤੋਂ ਘੋਖ਼ ਕਰ ਰਹੀ ਹੈ। ਮਾਮਲੇ ਨੂੰ ਨਫ਼ਰਤੀ ਹਮਲੇ ਵਜੋਂ ਦਰਜ ਕੀਤੇ ਜਾਣ ’ਤੇ ਵੀ ਵਿਚਾਰ ਕੀਤਾ ਜਾ ਰਿਹਾ ਹੈ। ਰੋਜ਼ਾਨਾ ਮੰਦਰ ਆਉਣ ਵਾਲੇ ਲੋਕਾਂ ਦਾ ਕਹਿਣਾ ਹੈ ਕਿ ਪੁਜਾਰੀ ਨੂੰ ਜਾਣਬੁੱਝ ਕੇ ਨਿਸ਼ਾਨਾ ਬਣਾਇਆ ਗਿਆ ਹੈ।